Plantun de Prouvènço

Pèr coumpara dos planto d'encò nostre

Carex otrubae & Plumbago europaea

Queirello(-d'Otruba)

Carex otrubae

Cyperaceae

Àutri noum : Moutouso, Sagneto.

Noms en français : Laîche cuivrée, Laîche couleur de renard.

Descripcioun :
Es uno queirello proun coumuno que trachis dins li prado e lis ermas umide, en ribo d'aigo, dins li sausiero... La planto èi grando (40 à 80 cm), sènso fiéu (estouloun), e fai uno mato denso emé de fueio pulèu larjo (5-6 mm), emé d'espigo, noun ramificado, coumpausado d'espiguet de flour mascle e femelo. Aquésti d'aqui soun emé dous estigmate.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 0,3 à 1 m
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Carex
Famiho : Cyperaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 2 à 6(10) cm
Flourido : Printèms

Sòu : Ca
Autour basso e auto : 0 à 800 m
Aparado : Noun

Liò : Prado umido - Ribiero - Palun - Ermas
Estànci : Mesoumediterran à Mountagnard
Couroulougi : Mediterrano-Atlantico
Ref. sc. : Carex otrubae Podp., 1922 (= Carex cuprina (Sandor ex Heuff.) Nendtv. ex A.Kern., 1863 )

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.